hobbi辦學機構宣傳指南:第二講,如何撰寫課程廣告內容

上回講到,點樣寫一個好嘅課程標題去令到你嘅課程可以響云云嘅課程目錄中更容易俾潛在嘅學生見到。今次,我哋就講下課程廣告最重要嘅一樣嘢──廣告內容嘅真身。

好喇,大家想像下,你上網搵興趣班,去網站搜尋引擎(search engine)搵下搵下,見到個網頁嘅標題唔錯,撳咗落去啦。點知去到果個網頁果度見到──哇乜都無嘅!就係得返果個一模一樣嘅標題、星期幾幾點上堂,然後………… 然後就沒有然後了…………。具體學乜嘢、邊個教,一句都無提過,你諗下果下你會幾咁失望兼失落呢,你諗下你會唔會真係去查詢、報名先。

所以換返個角度,你就諗到介紹課程內容有幾重要喇。

寫課程內容嘅時候,可以寫下下面幾個要點:

課程主旨
一個課程廣告最最最最重要嘅,無嘢重要得過話俾訪客(同埋潛在嘅學生)知,個班其實具體係學啲乜嘢㗎?
如果你嘅課程教嘅係好特別嘅嘢,咁呢個就係一個好好嘅機會去宣傳下,介紹下點特別法~
即使課程教嘅係一啲好日常嘅嘢,「個個都知係咩嚟啦」,就更加要講下點解你(訪客)要報我(導師)呢個班、上我嘅堂喇!
主旨嘅長短大約係100個中文字左右啦,最多嘅話,控制響200以下就可以喇。

對象
除左主旨之外,個課程嘅對象係乜嘢人都會重要:年紀(兒童?少年?大人?長者?)、有無預設嘅上堂條件──例如學生本身識唔識某種技巧、之前有冇上過同類型比較淺易、初級嘅單元、或者係相關嘅資格咁樣。如果你有開辦淺易、初級嘅單元課程,都不妨話俾人知喎!

學費、雜費
響hobbi嘅廣告客戶介面度,響輸入課程資料嘅時候,我哋係有一個學費欄俾廣告客戶輸入果個課程嘅收費嘅。收費係指學費同包括埋必須要嘅教材、材料費嘅總和。而課程嘅內文度,就可以講下「學費」中已經包含咗教材、材料費、同埋交通費、雜費等等咁樣。而如果係非必要嘅好似專業資格嘅考試費、證書費,都可以響內文度寫明。
如果機構可以分期俾學費,或者課程可以得到學費、雜費資助,亦都唔好唔記得提喎。

「然後又點呀?」
上完堂之後,可以學到做到啲乜嘢呢?會唔會有乜嘢試要考?考試又係唔係必要呢?考完會有咩資格、認證呀?或者有無啲製成品響上完堂之後可以攞走呢?
對訪客嚟講,呢啲資訊可以俾到佢哋預料到上完堂之後學有乜嘢得著。
或者如果係有分唔程度、級數、單元嘅話,亦都可以提下之後有啲乜嘢相關嘅課程可以再讀落去喎!

睇到呢度,係咪覺得……… 篇文好長呢? (我都知…)

其實,一篇「好」嘅課程廣告內文,應該係200字至400字左右,分成三至四段就可以。如果無Idea嘅,不如響hobbi.hk度搵多幾個其他類似(或者唔類似)課程參考參考下!