hobbi辦學機構宣傳指南:第四講,課程廣告審閱

為咗令作為辦學機構嘅你知道點樣有效咁運用文字、圖片去增加你嘅興趣班課程響網上嘅曝光率,更容易俾搜尋引擎、同埋潛在嘅學生搵到,hobbi.hk專門刊載「辦學機構宣傳指南」。過去我哋講解過過點樣寫課程廣告標題課程廣告內容辦學機構對廣告嘅重要性,呢次,我哋講下會同大家講下課程廣告審閱時候嘅部份標準。

響辦學機構提交咗佢哋嘅廣告之後,hobbi嘅客服人員都會收到新廣告嘅通知。為咗保持響hobbi.hk刊登嘅興趣班課程廣告響標題、內容上有一定嘅質素,我哋會廣告響出街前進行審閱。審閱時,除咗會參考已經響《hobbi.hk服務條款》中列明嘅行為外,我哋亦會因應課程廣告標題同文字內容嘅標準,去批准或者拒絕廣告刊登出街。

以下係大部份嘅情況下,課程廣告被拒絕響hobbi.hk上刊登嘅原因:

不適當課程廣告標題

課程廣告標題係唔容許以符號開首,亦唔可以用響標題開首部份以「試堂」、「免費」等作為招徠,如果要註明係免費或者試堂,可以放響課程課程廣告標題最後嘅位置。而響課程標題用上較誇張嘅宣傳語句,亦會有可能被拒絕。
我哋響《辦學機構宣傳指南:第一講,如何撰寫課程廣告標題》就有教大家點樣去寫一個合適,而且可以容易俾真人同電腦搜尋引擎(search engine)去搵到嘅課程廣告標題。

欠缺或不適當課程廣告內容

簡單講,如果完全無課程廣告內容文字,或者只係將課程廣告標題剪剪貼貼copy & paste抄一次響課程廣告內容嘅話。hobbi.hk嘅客服可以信心保證,一定**拒絕刊登**
另外,如果課程廣告內容文句不順、文法不通、錯漏百出,或者係拖沓冗長、辭不達意,又或者係過度渲染、誇張失實的話,hobbi.hk嘅客服亦都可以拒絕刊登。
有清楚嘅課程廣告內容,訪客同潛在嘅學生就知道,開班嘅人有信心寫到出嚟佢會教乜嘢,學生會學到乜嘢。如果連寫都寫唔到響個廣告度,或者寫到難以明白,訪客就只能對課程估估下,個查詢、報名意願就幾乎唔會存在。
如果唔知點樣寫課程廣告內容,或者可以睇睇《辦學機構宣傳指南:第二講,如何撰寫課程廣告內容》參考參考!

以上,係部份比較常見、課程廣告響hobbi.hk上被拒絕刊登嘅原因。我哋hobbi客服亦可能會響拒絕刊登時向機構提供建議,俾機構修改後重新提交。同時,hobbi.hk嘅功能、內部標準等都有可能會因應商業決定而不時作出修改,所以有可能會出現少部份舊廣告內文或者格式響重新刊登時被拒絕嘅情況出現。