hobbi辦學機構宣傳指南:第三講,辦學機構介紹

辦學機構宣傳指南」,係hobbi.hk為咗作為辦學機構嘅你而刊載嘅資訊。令你知道點樣有效咁運用文字、圖片去增加你嘅課程響網上嘅曝光率,更容易俾搜尋引擎、同埋潛在嘅學生搵到。我哋響辦學機構宣傳指南嘅第一講同第二講分別講過點樣寫課程廣告標題課程廣告內容,今次,我哋講下辦學機構介紹。

辦學機構,無論係規模極大嘅非政府組織同歷史悠久嘅宗教團體開辦嘅業餘課程,或者係響街坊商場開業小小嘅興趣班工作坊,其實都好需要有一段文字去形容下自己,俾有意思想知道更多嘅潛在學生知多少少,吸引到佢哋嚟查詢甚至係報名。

響hobbi.hk,我哋設有「機構主頁」俾每一個辦學機構。「機構主頁」內設有文字介紹、詳細資料同埋上載圖片三個欄目,機構可以響「機構主頁」設定頁上載標誌、頂頭封面圖同3張插圖,而文字介紹同詳細資料就可以俾機構嘅負責人向訪客介紹機構本身嘅各種文字資料。

圖片內容:標誌、封面與插圖

今時今日,靠宣傳圖片內容係非常重要,所以hobbi亦留咗好幾個位置俾辦學機構善用圖片做宣傳用途。要注意嘅係,我哋非常建議辦學機構用返自己拍攝嘅相片,千祈唔好未問過人就網上亂用其他人嘅相喎!

機構標誌

hobbi.hk 為辦學機構嘅標誌 (logo) 框呈方形,即係用宜家外面嘅社交通訊網絡平台、好似係facebook、whatsapp同埋微信等等嘅格式差唔多。我哋建議上載最少256像素 × 256像素大小嘅標誌圖,咁當張相響高清手機上嘅App度顯示時都唔會矇查查啦。

主頁封面

hobbi.hk 機構主頁封面就係一幅比較大嘅圖,類似facebook主頁上面張封面大圖。機構主頁封面最好係打橫,闊1600像素以上,封面未必需要「搶眼」,可能只係一大幅學生學上堂嘅情況、教室入面嘅廣角相就已經好夠。因為唔好唔記得,訪客主要入嚟係睇主頁嘅內容去考慮查詢或者報名,而唔係睇主頁封面有幾「搶眼」。

插圖

每個機構主頁都可以加入最多三幅插圖,插圖橫、直不拘。插圖嘅內容可以係上課實況、教室外觀佈置,或者係課程習作嘅製成品等等。

文字內容:機構介紹與詳細資料

機構介紹

係hobbi.hk 機構主頁內比較重要嘅文字內容,俾訪客或者潛在嘅學生對機構有更多了解。機構介紹唔駛長,只需要幾個重點,每一個重點都係一句起、兩句止,組成一至兩段文字就可以。響機構主頁入面,機構介紹會用粗體表示,如果文字太長,會好難閱讀。

撰寫機構介紹時可以考慮下面嘅重點:

  • 機構成立日期
  • 辦學目的
  • 服務地區
  • 導師資歷、資格

……等等……

詳細資料

就係更加多嘅機構詳細資料,好似係…

  • 報名方法
  • 收費方式
  • 上課時注意事項
  • 上課地點的營業時間
  • 惡劣天氣上課安排

… 等有用資料。如果辦學機構嘅資料詳細,可以令訪客或者潛在嘅學生對機構更有信心,知道辦學機構即使唔係好大規模,但係負責人都有交帶、做嘢企理。而當學生報名上課前後遇上相關問題,機構方面亦可以將機構詳細資料呢個欄目嘅資料用嚟提醒學生。

希望上面嘅教學可以俾到一啲idea大家點樣去準備辦學機構嘅資料同寫文字內容,到時唔單止search engine同真人訪客,自己睇返自己個機構響 hobbi.hk 網站同App嘅主頁時都覺得靚靚仔仔~